لاہور (خصوصی نامہ نگار) پنجاب اسمبلی میں اپوزیشن ارکان آج اسٹینڈنگ کمیٹیوں سے اپنے استعفے سپیکر کو جمع کرائیں گے، مسلم لیگ (ن) کی طرف سے پارلیمانی وفد آج صبح دس بجے پنجاب اسمبلی پہنچے گا، مسلم لیگ (ن) کے پارلیمانی وفد میں سینئر لیگی رہنما و سابق سپیکر رانا اقبال، عظمیٰ زاہد بخاری، ندیم کامران، سمیع اللہ خان اور ذیشان رفیق شامل ہونگے۔ ذرائع کے مطابق پیپلز پارٹی نے پنجاب اسمبلی کی اسٹینڈنگ کمیٹیو ں سے مستعفی ہونے سے انکار کردیا ہے، مسلم لیگ (ن) اپوزیشن لیڈر پنجاب اسمبلی حمزہ شہباز کو پبلک اکاونٹس کمیٹی کا چیئر مین نہ بنانے اور ان کے پروڈکشن آڈر جاری نہ کرنے کیخلاف اسٹینڈنگ کمیٹیو ں استعفے دے رہی ہے۔ یاد رہے گزشتہ ماہ مسلم لیگ (ن) کے تمام اراکین نے استعفے سابق سپیکر رانا اقبال کو جمع کرا دیئے تھے۔