لاہور(نمائندہ سپورٹس) پاکستان اوپن ٹینس چیمپئن شپ کل سے باغ جناح میں شروع ہو گی۔ اعصام الحق اور عقیل خان سمیت تمام ٹاپ مرد و خواتین کھلاڑی شرکت کریں گے۔پنجاب ٹینس ایسوسی ایشن کے زیر اہتمام پانچ روزہ پاکستان اوپن ٹینس چیمپئن شپ میں ڈیوس کپ اور ساف چیمپین شپ کھیلنے والی ٹیم سمیت ملک کے ٹاپ ٹین مرد اور خواتین کھلاڑی سنگل اورڈبلز میں شرکت کریں گے۔ پنجاب ٹینس ایسوسی ایشن کے سیکرٹری رشید ملک نے پریس کانفرنس کرتے ہوئے کہا کہ ایونٹ میں سات لاکھ پرائز منی دی جائے گی۔ ایونٹ میں 17 نومبر کو مختلف ایج گروپ کیٹیگریز میں کوالیفائنگ راؤنڈ کھیلے جائیں گے۔ پنجاب میں پچھلے آٹھ سال میں جونئیر پر کام کررہے ہیں۔ گراس روٹ کو آباد کرنا ہے تاکہ پاکستان کا نام روشن ہو۔ میری پہلی کوشش ہے کہ پنجاب کے ڈومیسٹک سٹرکچر کو مضبوط کیا جائے۔ ایونٹ میں انڈر 6, انڈر 8, انڈر 10, انڈر 12، انڈر 14، انڈر 16 اور انڈر 18 کی کیٹگریز کے علاوہ مین سنگلز اور ڈبلز، ویمن سنگلز اور سینئر کیٹگری کے مقابلے رکھے گئے ہیں۔ ایونٹ سے قومی ٹیم کے کھلاڑیوں کو ساف چیمپئن شپ اور ڈیوس کپ کیلئے اچھی پریکٹس ملے گی۔