لاہور(سپورٹس رپورٹر) قائداعظم ٹرافی کے آٹھویں راؤنڈ کا آغاز آج پیر سے ہوگا۔دلچسپ مرحلے میں داخل ہونے والے ایونٹ میں صرف تین راؤنڈز باقی رہ گئے ہیں۔ناردرن اور سدرن پنجاب کے مابین میچ آر ایل سٹیڈیم راولپنڈی،سندھ کا مقابلہ سنٹرل پنجاب سے نیشنل اسٹیڈیم کراچی اور تیسرے میچ میںبلوچستان اور خیبرپی کے کی ٹیمیں یو بی ایل سپورٹس کمپلیکس کراچی میں مدمقابل ہونگی۔آٹھویں راؤنڈ میں ناردرن کا مقابلہ پوائنٹس ٹیبل پر دوسرے نمبر پر موجود سدرن پنجاب کے خلاف ہوگا۔ 58 پوائنٹس کیساتھ پوائنٹس ٹیبل پر آخری نمبر پر موجود سندھ کی ٹیم کو آٹھویں راؤنڈ میں سنٹرل پنجاب کے خلاف میچ کھیلنا ہے۔ 108 پوائنٹس کیساتھ پوائنٹس ٹیبل پر پہلے نمبر پر براجمان سنٹرل پنجاب کی ٹیم کو زیر کرنے کیلئے سندھ کو جامع حکمت عملی اپنانا ہوگی۔آئندہ راؤنڈ میں خیبرپی کے اور بلوچستان کے درمیان میچ یو بی ایل سپورٹس کمپلیکس کراچی میں کھیلا جائیگا۔ ابتدائی طور پر ایبٹ آباد میں شیڈول میچ کو موسم میں غیرمتوقع تبدیلی کے باعث کراچی منتقل کردیا گیا تھا۔