لاہور، قصور، سانگلاہل میں 3 افراد ٹرینوں کی زد میں آکر دم توڑ گئے
لاہور، قصور، سانگلاہل (نمائندہ خصوصی+ نمائندہ نوائے وقت )کوٹ لکھپت ریلوے سٹیشن کے قریب نا معلوم شخص ٹرین تلے آکر جاں بحق ہو گیا ۔ راہگیروں کے مطابق نامعلوم شخص ریلوے لائن عبور کرتے ٹرین کی زد میں آکر موقع پر ہی دم توڑ گیا ۔ پولیس نے نعش مردہ خانے منتقل کردی۔ قصورسے نمائندہ نوائے وقت کے مطابق لنڈا پھاٹک پتو کی میں ریلوے لائن کراس کرتے ہوئے 40 سالہ نامعلوم شخص ریلوے انجن کی زد میں آکر جاں بحق ہوگیا۔ سانگلاہل سے نمائندہ نوائے وقت کے مطابق ریلوے کراسنگ لیول مڑھ بلوچاں روڈ پر ایک موٹر سائیکل سوار عمران مسیح ٹرین کی زد میں آکر ہلاک ہوگیا۔ حادثہ میں موٹر سائیکل تباہ ہوگئی،چک نمبر45مرڑ کے بوٹا مسیح کا بیٹا عمران مسیح لائن عبور کررہاتھا۔
