راجستھان یونیورسٹی میں 4 کشمیری طلباء پر 70 نوجوانوں کے گروپ کا شدید تشدد
جے پور (نوائے وقت رپورٹ) راجستھان یونیورسٹی میں 4 کشمیری طلباء پر کم و بیش 70 طلباء کے ہجوم نے شدید تشدد کیا جس کے نتیجہ میں ایک طالب علم شدید زخمی ہو گیا، اسے طبی امداد کے لئے ہسپتال داخل کرا دیا گیا ہے۔ بتایا گیا ہے کہ لوہے کے راڈز اور چھریوں سے مسلح ان طلباء نے معمولی تکرار پر کشمیری طلباء پر حملہ کر دیا۔ قبل ازیں کسی تنازعہ پر ہونیوالی تکرار کے بعد یونیورسٹی حکام نے بیچ بچاؤ کرا دیا تھا مگر رات گئے اچانک کشمیری طلباء کو تشدد کا نشانہ بنا دیا گیا۔ حملہ آور طلباء کا تعلق بہار سے بتایا گیا ہے۔ ایک طالب علم کے چہرے اور پیٹ پر شدید زخم آئے۔
