لاہور(سپورٹس رپورٹر+نمائندہ سپورٹس )پاکستان انڈر 19 کرکٹ ٹیم کے ہیڈ کوچ اعجاز احمد نے فاسٹ بائولر نسیم شاہ کو پاکستان انڈر 19 کیلئے اہم قرار دیتے ہوئے کہا کہ چیف سلیکٹر اور ہیڈ کوچ مصباح الحق سے نسیم شاہ کو مانگ لیں گے۔نسیم شاہ قومی ٹیم کا حصہ ہیں ۔ اعجازاحمد کا کہنا ہے کہ نسیم شاہ ہینڈی بائولر ہے اور وہ ٹیم کامرکزی بائولر ہے، جب آسٹریلیا سے ہیڈ کوچ اور چیف سلیکٹر مصباح الحق وطن واپس آئیں گے تو ان سے نسیم شاہ کے حوالے سے بات کریں گے۔ اب چونکہ سیریز سری لنکا کے خلاف ہے اور سیریز بھی ہمارے اپنے گراؤنڈز پر کھیلی جا رہی ہے اور اتنے فاسٹ بائولرز کی بھی ضرورت نہیں ہو گی اس لیے نسیم شاہ کے حوالے سے ان سے بات کریں گے اور درخواست کریں گے کہ انہیں ریلیز کر دیا جائے کیونکہ انڈر 19 کرکٹ ورلڈ کپ بھی بڑی اہمیت کا حامل ہے۔ مجھے امید ہے کہ نسیم شاہ کیمپ میں آئیں گے اور دیگر کھلاڑیوں کیساتھ ٹریننگ کریں گے تاکہ اگلے ماہ ہونے والے ورلڈ کپ کے لیے سب مل کر تیاری کریں، نسیم شاہ ٹیم کا سب سے مؤثر ہتھیار ہے، اس کی ٹیم کو ضرورت ہے۔ نسیم شاہ کو قومی ٹیم کے ساتھ رہنے کا فائدہ ہو گا، اس کو اندازہ ہو گیا ہے کہ ان کنڈیشنز میں کیسے بائولنگ کرنا ہے اور بڑے کھلاڑیوں کے سامنے کیسے کھیلنا ہے۔ قومی ٹیم کے ساتھ رکھنے کا مقصد بھی نسیم شاہ کو گروم کرنا ہے۔ نسیم شاہ ابھی اتنا تجربہ کار نہیں ہے،ابھی بچہ ہے اور اس کے مقابلے میں آسٹریلیا کی مضبوط ٹیم کے کامیاب بیٹسمین تھے اس لیے نسیم شاہ کو تھوڑی مشکل پیش آئی لیکن نسیم شاہ نے یقیناً بہت کچھ سیکھا ہوگا، ایک میچ سے کسی کھلاڑی کی کارکردگی کا اندازہ نہیں لگایا جا سکتا۔پاکستان انڈر 19 کرکٹ ٹیم کے ممکنہ کھلاڑیوں کا تربیتی کیمپ ان دنوں لاہور میں جاری ہے۔ امکان ہے کہ حتمی سکواڈ کا اعلان آئندہ ہفتے کیا جائیگا۔ ورلڈ کپ اگلے ماہ جنوبی افریقہ میں کھیلا جائے گا۔