لاہور ( نمائندہ سپورٹس) پاکستان ہاکی فیڈریشن کے زیر اہتمام جاری 36ویں قومی جونیئر ہاکی چیمپئن شپ میں کسٹمز اور واپڈا نے اپنے اپنے میچز جیت کر فائنل میں جگہ بنا لی ہے۔ دونوں سیمی فائنل گزشتہ روز نیشنل ہاکی سٹیڈیم میں منعقد ہوئے ،پہلے سیمی فائنل مقابلے میں کسٹمز نے سنسنی خیز مقابلے کے بعد پنجاب ( اے ) کی ٹیم کو صفر کے مقابلے ایک گول سے شکست دی۔کسٹمز کی جانب سے واحد گول سمیع نے 48ویں منٹ میں سکور کیا۔دوسرے سیمی فائنل میچ میں واپڈا نے سوئی سدرن گیس کمپنی کی ٹیم کو سخت مقابلے کے بعد ایک صفر سے شکست دے کر ایونٹ کے فائنل کے لیے کوالیفائی کر لیا،علی عزیز نے واپڈا کی جانب سے گول سکور کر کے اپنی ٹیم کو برتری دلوائی جو میچ کے آخر تک برقرار رہی۔جونیئر چمپیئن شپ کا فائنل میچ آج نیشنل ہاکی سٹیڈیم میں کھیلا جائے گا۔جبکہ تیسری پوزیشن کے لیے پنجاب ( اے ) اور سوئی سدرن گیس کمپنی کی ٹیمین پنجہ آزمائی کریں گی۔