لاہور(سپورٹس رپورٹر) 36 نیشنل جونیئر ہاکی چیمپئن 2019ء کا ٹائٹل پاکستان واپڈا ٹیم نے جیت لیا۔ واپڈا نے فائنل کسٹمز ٹیم کو پانچ صفر سے زیر کیا جبکہ تیسری پوزیشن کے میچ میں سوئی سدرن گیس کمپنی ٹیم نے پنجاب اے کو شکست دیکر وکٹری سٹینڈ تک رسائی حاصل کی۔ واپڈا کی جانب سے ابرار حسین نے فیلڈ گول کر کے ٹیم کو برتری دلائی۔ یاسر نے فیلڈ گول کر کے مقابلہ دو صفر کر دیا۔ تیسرے کوارٹر میں حماد انجم نے گول کر کے مقابلہ تین صفر کر دیا۔ واپڈا ٹیم نے چوتھے کوارٹر میں مزید دو گول کر کے میچ میں پانچ صفر سے کامیابی حاصل کی۔ سوئی گیس ٹیم نے پنجاب اے کو پنالٹی شوٹ آئوٹ پر چار دو سے ہرا کر تیسری پوزیشن حاصل کی۔ ٹورنامنٹ کے بہترین کھلاڑی کا ایوارڈ پنجاب اے کے حنان شاہد کے حصے میں آیا۔ ٹورنامنٹ کی اختتامی تقریب کے مہمان خصوصی پاکستان ہاکی فیڈریشن کے صدر بریگیڈئر (ر) خالد سجاد کھوکھر اور سابق صدر پی ایچ ایف اولمپیئن اختر رسول تھے جنہوں نے کھلاڑیوں میں انعامات تقسیم کیے۔