لاہور(سپورٹس رپورٹر+نمائندہ سپورٹس) پی جی اے لیڈیز گالف چیمپیئن شپ 2019ء کا ٹائٹل حمنہ امجد نے جیت لیا۔ پی اے ایف سکائی ویو گالف کورس میں منعقدہ چیمپیئن شپ میں ملک بھر سے بڑی تعداد میں لیڈیز گالفرز نے حصہ لیا۔ پی اے ایف سکائی ویو کی حمنہ امجد نے مسلسل تیسری مرتبہ چیمپیئن ہونے کا اعزاز حاصل کیا۔ انہوں نے تین روز تک جاری رہنے والے ایونٹ میں 240 گراس سکور کے ساتھ پہلی پوزیشن حاصل کی۔ سنیا اسامہ نے 264 گراس سکور کے ساتھ دوسری جبکہ عزالہ یاسمین تیسرے نمبر پر رہیں۔ ہینڈی کیپ 14 سے 24 کیٹگری میں ایمان علی شاہ فاتح رہیں۔ عائشسہ فیضان نے دوسری جبکہ زینت عائشہ نے اس کیٹگری میں تیسری پوزیشن حاصل کی۔ نیٹ کیٹگری میں مومنہ تارڑر نے پہلی، شہناز معین نے دوسری جبکہ ادیبہ سلیم نے تیسری پوزیشن حاصل کی۔ چیمپیئن شپ کی اختتامی تقریب کے مہمان خصوصی ائرمارشل (ر) تنویر محمود احمد اور مسز تنویر تھے جنہوں نے کامیاب خواتین گالفرز انعامات تقسیم کیے۔