لاہور (سپورٹس رپورٹر) لیفٹیننٹ جنرل شاہ رفیع عالم میموریل پولو کپ ٹورنامنٹ ڈائمنڈ پینٹس نے جیت لیا، فائنل میں دلچسپ مقابلے کے بعد ماسٹر پینٹس کو 6-5 سے ہرا دیا۔ لاہور پولو کلب میں کھیلے جانے والے ٹورنامنٹ کا فائنل ڈائمنڈ پینٹس اور ماسٹر پینٹس کے درمیان دلچسپ رہا۔ پہلے چکر میں ڈائمنڈ پینٹس نے دو گول سکور کرکے برتری حاصل کرلی۔ دوسرے چکر میں ماسٹر پینٹس نے دو اور ڈائمنڈ پینٹس نے ایک گول سکور کیا جبکہ تیسرے چکر میں ڈائمنڈ پینٹس نے دو اور چوتھے میں ماسٹر پینٹس نے دو گول سکور کیے۔ ڈائمنڈ پینٹس ٹیم نے پانچ کے مقابلے چھ گول سے کامیابی اپنے نام کی۔ ڈائمنڈ پینٹس کی راجہ ارسلان نجیب نے تین گول، جیک ولیم ہائیڈ، میر شعیب احمد اور میر حذیفہ احمد نے ایک ایک گول سکور کیا۔ ماسٹر پینٹس کی طرف سے میریانو ریگل نے چار، بلال حئی نے ایک گول سکور کیا۔ سب سڈری فائنل میں باڑیز نے آخری لمحوں میں منوں پولو /گارڈ گروپ کوآدھے گول کے فرق سے ہرا کر سب سڈری فائنل جیت لیا۔ باڑیز کی طرف سے اریسنٹو ٹروٹز نے پانچ جبکہ جمیل باڑی نے ایک گول سکور کیا۔ منوں پولو/گارڈ گروپ کی طرف سے عامر رضا بہبودی نے پانچ اور ثاقب خان خاکوانی نے ایک گول سکور کیا۔ فائنل کے مہمان خصوصی شاہد ستار تھے جنہوں نے کھلاڑیوں میں انعامات تقسیم کیے۔ اس موقع پر لیفٹیننٹ جنرل (ر) شاہ رفیع عالم کی بیوہ مسز تمیز عالم، لاہور پولو کلب کے صدر ملک عاطف یار ٹوانہ، عمر لیاقت، شاہ قبلائی عالم، شاہ شمیل عالم موجود تھے۔