لاہور(سپورٹس رپورٹر) پاکستان کرکٹ بورڈ نے پی ایس ایل کے پانچویں ایڈیشن کے تمام مقابلے پاکستان میں سجانے کے لیے تیاریاں تیز کر دیں۔ لیگ کی افتتاحی تقریب کراچی جبکہ فائنل میچ لاہور میں کھیلا جائے گا۔ پاکستان سپر لیگ فائیو کے شیڈول پر مشاورت مکمل ہوگئی ہے۔ ذرائع کے مطابق پانچویں ایڈیشن کی افتتاحی تقریب کراچی جبکہ فائنل ٹاکرا قذافی اسٹیڈیم میں منعقد ہوگا۔ ذرائع کا کہنا ہے کہ پی ایس ایل فائیو کے میچز ملتان سمیت چار شہروں میں کھیلے جائیں گے۔ ایونٹ کے دوران لاہور میں 13، کراچی میں 9 ، راولپنڈی میں 8 اور ملتان میں چار میچز کرانے کی منصوبہ بندی کی گئی ہے ۔ذرائع نے یہ بھی بتایا کہ پی ایس ایل فائیو فرنچائز کے ساتھ شیڈول پر اتفاق رائے طے پایا جا چکا ہے جبکہ شیڈول کا باضابطہ اعلان سری لنکا کے خلاف سیریز کے بعد کیا جائے گا۔