لاہور(سپورٹس رپورٹر+نمائندہ سپورٹس)پاکستان اورسری لنکا کی ٹیموں نے کل جمعرات سے کراچی میں کھیلے جانیوالے دوسرے ٹیسٹ کے لیے تیاریوں کا آغاز کردیا، دونوں ٹیموں نے نیشنل سٹیڈیم کراچی میں بھرپور پریکٹس کی۔ڈی جی رینجرزسندھ میجرجنرل عمراحمد بخاری نے کراچی میں ہونے والے آئی سی سی ٹیسٹ چیمپئن شپ کا دوسرے ٹیسٹ میچ سے متعلق سکیورٹی کے انتظامات کا جائزہ لیا اور سری لنکن کھلاڑیوں سے بھی ملاقات کی۔ڈی جی رینجرزسندھ میجرجنرل عمراحمد بخاری کا کہنا تھا کہ مہمان ٹیم کیلئے سکیورٹی کے انتظامات بہترین ہیں، فول پروف سکیورٹی فراہم کی جائے گی، انہوں نے کہا کہ ملک میں ٹیسٹ کرکٹ کی بحالی کراچی سمیت پورے ملک کیلئے خوشی کا باعث ہے۔نیشنل سٹیڈیم میں پاکستان اورسری لنکا کی ٹیمیں سخت سکیورٹی کے حصار میں ٹریننگ کیلئے سٹیڈیم پہنچیں، سٹیڈیم کے اندر اور اطراف میں سکیورٹی کے سخت انتظامات کیے گئے تھے۔پاکستانی ٹیم نے فزیکل ٹریننگ اورفٹبال کھیلی پھر نیٹس پربیٹنگ اوربائولنگ کی خوب مشقیں کیں جبکہ سری لنکن کھلاڑیوں نے بھی پریکٹس میں خوب جان ماری۔ دونوں ٹیمیں جمعرات سیکراچی میں دوسرے ٹیسٹ میچ کے لیے ایکشن میں ہوں گی۔ قومی ٹیم کے ہیڈکوچ مصباح الحق کا کہنا ہے کہ ٹیم میں ان کھلاڑیوں کو شامل کریں گے جن کی ضرورت ہوگی جبکہ احمد شہزاد اورعمر اکمل ٹی ٹونٹی کے اچھے کھلاڑی ہیں۔ پاکستان ٹیم کی فاسٹ بائولنگ کا شعبہ محنت کا متقاضی ہے، ہمیں نتائج کیلئے حریف ٹیم کو دو مرتبہ آؤٹ کرنے کی صلاحیت درکار ہے، دورہ آسٹریلیا میں یہ اچھی بات رہی کہ ہماری بیٹنگ لائن میں بہتری آئی، بابراعظم نے خود کو تسلیم کروایا۔فاسٹ بائولر محمد عامر اور وہاب ریاض کے حوالے سے کہا کہ فاسٹ بائولر پر محنت کی جاتی اور کثیر سرمایہ کاری کی جاتی ہے، ضرورت کے وقت ٹیم کو چھوڑ کر جانا درست نہیں۔ دوہری ذمہ داری سے فرق نہیں پڑتا، خامیاں پرانی ہیں،سدھارنے کی کوشش کر رہے ہیں، مستقبل بنیادوں پر طویل المدتی منصوبے پر کام کر رہا ہوں، توانائی ٹیم کی بہتری پر لگانے کی کوشش کررہا ہوں، جلد بازی نہیں کر سکتے جبکہ 16 کھلاڑی ٹیم میں ایک ساتھ نہیں کھلا سکتے، جگہ بنانے کیلئے کھلاڑیوں کو انتظار کرنا ہوگا، فارم والے کھلاڑی کو ہٹا کر کسی اور کو نہیں کھلا سکتے، زیادہ کرکٹ کھیلنے سے زیادہ مواقع میسر آ تے ہیں۔ایک سوال کے جواب میں انہوں نے کہا کہ مکی آرتھر کے حریف ہونے سے کوئی فرق نہیں پڑتا، آسٹریلیا سیریز میں ہماری بیٹنگ نے بہتر پرفارم کیا، ہمیں اچھا بائولنگ اٹیک بھی ملا، سری لنکا کیخلاف کراچی ٹیسٹ میں سپورٹنگ وکٹ کی حمایت کی جو فاسٹ بائولرز کی مدد کرے گی، حتمی ٹیم کا فیصلہ میچ سے قبل کریں گے، آئندہ آنے والی سیریز مقابلوں کے لیے منصوبہ کر رہے ہیں، دورہ انگلینڈ سے قبل فاسٹ بائولنگ کے شعبہ کو مضبوط کریں گے، احمد شہزاد اورعمر اکمل ٹی ٹونٹی کے اچھے کھلاڑی ہیں، اگر میچز نہیں بھی ملتے تو کیمپس لگا کر نوجوان کھلاڑیوں کے ساتھ کام کریں گے۔ مصباح الحق نے سری لنکا کے خلاف دوسرے ٹیسٹ میں بھی فواد عالم کو موقع نہ دینے کا اشارہ دیدیا۔ جب پلیئنگ الیون میں فواد عالم کی شمولیت کے حوالے سے پوچھا گیا تو انہوں نے کہا کہ فواد عالم پچھلے 10 سال سے ٹیسٹ ٹیم میں نہیں آیا، فواد عالم کی ضروت پڑی تو کھلائیں گے۔