لاہور( نمائندہ سپورٹس ) یوم قائد اعظم کے حوالے سے لاہور تا ساہیوال سائیکل ریس ریلویز کے داد شاہ نے جیت لی۔ یوم قائد اعظم کی مناسبت سے لاہور تا ساہیوال تک سائیکل ریس پاکستان ریلویز کے چیمپئن بننے کے ساتھ اختتام پذیر ہو گئی، ریس کا آغاز ہفتہ کی صبح ساڑھے آٹھ بجے پنجاب سٹیڈیم لاہور سے ہوا۔بلوچستان کے کفایت اللہ اور اعظم دوسرے اور تیسرے نمبروں پر رہے۔ پنجاب کے شکیل نے چوتھی، ثناء اللہ نے پانچویں اور زوہیب نے چھٹی پوزیشن حاصل کی۔اختتامی تقریب کے مہمان خصوصی کمشنر ساہیوال نے پاکستان سائیکلنگ فیڈریشن کے ادریس حیدر خواجہ، کامران امین اور وقار علی کے ہمراہ فاتح کھلاڑیوں میں انعامات تقسیم کئے۔ ان کا کہنا تھا کہ ایونٹ کا مقصد نہ صرف بانی پاکستان قائد اعظم محمد علی جناح کے یوم ولادت کو بھر پور انداز میں منانا تھا بلکہ کھلاڑیوں کو صلاحیتوں کے اظہار کا موقع بھی فراہم کرنا تھا۔