اسلام آباد (اپنے سٹاف رپورٹرسے) تھانہ کوہسار کے علاقے جناح سپر میں واقع ریسٹورینٹ میں گیس سلنڈر پھٹنے دے ہولناک دھماکہ ہوگیا جس سے شہر میں خوف وہراس پھیل گیا، دھماکے کے نتیجے میں 13 افراد شدید زخمی ہوگئے جنہیں فوری طبی امداد کیلئے ہسپتال منتقل کر دیا گیا۔ تفصیلات کے مطابق ہفتے کی شب جناح سپر کے آٹریو کیفے میں گیس سلنڈر پھٹنے سے زور دار دھماکہ ہوگیا، عینی شاہدین کے مطابق گیس سلنڈرمیں لیکج کے باعث اچانک اس میں آگ بھڑک اٹھی اور سلنڈر زور دار دھماکے سے پھٹ گیا۔ دھماکے کی آواز دوردورتک سنی گئی، جس سے پولیس افسران جائے وقوعہ پہنچ گئے ،دھماکے کی آواز اتنی زیادہ تھی کہ اہل علاقہ میں شدید خوف وہراس پھیل گیا۔ واقعہ میں تین افراد زخمی ہوگئے جبکہ آٹریو کیفے کو شدید نقصان پہنچا، زخمی ہونے والے افراد کو فوری طور پر مقامی ہسپتال منتقل کر دیا گیا ہے۔ جہاں انہیں طبی امداد دی جارہی ہے ۔پولیس کے مطابق جناح سپر مارکیٹ میں سلنڈر دھماکے سے ریسٹورنٹ کو شدید نقصان پہنچا، 13 افراد زخمی ہوگئے جن کی حالت خطرے سے باہر ہے، زخمی ہونے والے افراد کو فوری طور پر پمز ہسپتال منتقل کردیا گیا ہے جہاں انہیں طبی امداد دی جارہی ہے۔