گجرات +بھمبر (نامہ نگاران) کوٹلہ ارب علی خاں میں گھر میں آتشزدگی پر 60سالہ خاتون 3بیٹیوں اور 2بیٹوں سمیت زندہ جل گئی۔ تفصیلات کے مطابق نواحی گائوں آچھ گوچھ میں سردی کے باعث جلائی گئی انگیٹھی سے اچانک آگ بھڑک اٹھی،گھر میں سوئی ہوئی 60سالہ نسیم بی بی، اسکی بیٹیاں طیبہ، مدیحہ ، زوبیہ اور بیٹے کاشف، فیصل ہلاک ہو گئے۔ تھانہ ککرالی کے مطابق متوفیان کے قریبی عزیزوں کو مکان سے دھواں اٹھنے پر واقعہ کا علم ہوا۔ ریسیکو حکام کے مطابق ہلاک ہونیوالے دونوں نوجوان گونگے ، بہرے تھے جبکہ گھر کا سربراہ امانت پہلے ہی فوت ہو چکا ہے۔ کمرے میں آگ لگنے اور دھواں بھر جانے کے باعث ہلاکتیں ہوئیں۔ خاندان کا ایک نوجوان بیرون ملک یونان ہونے کی وجہ سے بچ گیا۔ چھ افراد کی نمازجنازہ ادا کر دی گئی جنہیں ایکدوسرے کے پہلو میں سپردخاک کر دیا گیا۔ بھمبر سے نامہ نگار کے مطابق 25 سالہ کاشف اور 30سالہ فیصل دونوں غیرشادی شدہ تھے جبکہ امانت مرحوم کی بیٹیاں طیبہ زوجہ ارشد ساکن بنیاں اور زوبیہ زوجہ عمران ساکن کالس والدہ سے ملنے آئی ہوئی تھیں کہ آتشزدگی سے لقمہ اجل بن گئیں۔ پولیس مصروف تفیش ہے۔