لاہور(سپورٹس رپورٹر ) صوبائی سنٹرل کنٹریکٹ کھلاڑیوں کے فزیکل فٹنس ٹیسٹ گذشتہ روز نیشنل کرکٹ اکیڈمی لاہور میں ہوئے۔ سینٹرل پنجاب فرسٹ الیون ٹیم کے کھلاڑیوں کے فزیکل فٹنس ٹیسٹ مکمل ہو گئے اس موقع پر لاہور سے تعلق رکھنے والے دیگر ٹیموں کے کھلاڑیوں کے فزیکل فٹنس بھی لئے گئے۔ دو روزہ فزیکل فٹنس ٹیسٹ آج بھی جاری رہیں گے۔ ذرائع کے مطابق عمر اکمل ، کامران اکمل ، سلمان بٹ کی فٹنس میں نمایاں بہتری آئی ہے۔ احمد شہزاد اور فہیم اشرف کے فٹنس ٹیسٹ 21 اور 22 جنوری کو ہوں گے۔ پی سی بی سٹرینتھ اینڈ کنڈیشنگ کوچ یاسر ملک نے ٹیسٹ کی نگرانی کی۔ کھلاڑیوں کے یویو، بیپ ،اینڈیورنس، اسٹرنتھ اور کراس فٹ ٹیسٹ ہوئے۔ اپریل کے پہلے ہفتے کھلاڑیوں کے دوبارہ فزیکل فٹنس ٹیسٹ ہوں گے۔ اس موقع پر سنٹرل پنجاب کرکٹ ٹیم کے ہیڈ کوچ اعجاز جونیئر نے کھلاڑیوں کی فٹنس کو مثالی قراردیا۔ ان کا کہنا تھا کہ قائد اعظم ٹرافی میں سینٹرل پنجاب کی کامیابی بہتریں ٹیم ورک کا نتیجہ ہے۔ ایک مشکل ٹورنامنٹ تھا ہماری ٹیم بہترین کھلاڑیوں پر مشتمل ہے۔ ٹورنامنٹ کے دوران کامران اکمل، عمر اکمل ،سلمان بٹ نے بہترین کارکردگی کا مظاہرہ کیا۔ مستقبل کی حکمت عملی بنالی ہے جس پر جلد کام شروع کردیں گے۔