لاہور(سپورٹس رپورٹر+نمائندہ سپورٹس)پاکستان ٹی ٹونٹی ٹیم کے کپتان بابر اعظم نے کہا ہے کہ بنگلہ دیش کیخلاف ٹی ٹونٹی سکواڈ کے انتخاب میں میرا بھی ان پٹ شامل تھا۔لاہور میں چیف سلیکٹر کے ہمراہ پریس کانفرنس کرتے ہوئے بابراعظم نے کہا کہ آسٹریلیا میں جونیئر پلیئرز لے کر گئے تھے، وہاں ہارے بھی اس لئے سینئرز کو واپس لے کر آئے ہیں، میری رائے میں بنگلہ دیش کے خلاف سیریز کیلئے جونیئر اور سینئرز کا اچھا کمبی نیشن بنایا ہے۔ حارث رؤف پی ایس ایل میں اچھی بائولنگ کرتا آ رہا ہے، آسٹریلیا میںبگ بیش لیگ کے دوران بھی اس نے اچھی پرفارمنس دکھائی، ہمیں لگا کہ اس کی کارکردگی میں بہتری آرہی ہے اور وہ ہمارے لیے اور ٹیم کیلئے بہتر ثابت ہوسکتا ہے۔ پوری کوشش ہوگی کہ اب بنگلہ دیش کیخلاف کھیلی جانے والی ہوم سیریز میں اچھی کارکردگی کا مظاہرہ کریں۔ شعیب ملک اور محمد حفیظ کی شمولیت سے ٹیم میں تجربہ کا اضافہ ہوا ہے جو ٹیم کے کام آئیگا۔