لاہور(سپورٹس ڈیسک) پال سٹیرلنگ کی دھواں دار اننگز کی بدولت آئرلینڈ نے پہلے ٹی ٹونٹی کرکٹ میچ میں ویسٹ انڈیز ٹیم کو 4 رنز سے ہرا کر اپ سیٹ کر دیا۔سینٹ جارج کے مقام پر کھیلے گئے تین میچوں کی سیریز کے پہلے میچ میں آئرش ٹیم کے کپتان اینڈی بلبیرنی نے ٹاس جیت کر پہلے بیٹنگ کا فیصلہ کیا۔ آئرش ٹیم نے 7 وکٹوں پر 208 رنز بناکر ویسٹ انڈیز کو میچ میں کامیابی کیلئے 209 رنز کا ہدف دیا۔ پال سٹرلنگ نے 47 گیندوںپر 95 رنز بنائے، کیون اوبرائن 48 رنز کیساتھ نمایاں رہے۔ شیلڈن کوٹرل، خاری پیری اور براوو نے دو، دو کھلاڑیوں کو آئوٹ کیا۔ جواب میں میزبان ٹیم 7 وکٹوں پر 204 رنز بناسکی۔ ایون لیوس 53 کیساتھ نمایاں رہے۔ جوش لٹل نے تین اور کریگ ینگ نے دو کھلاڑیوں کو آئوٹ کیا۔ پال سٹرلنگ کو میچ کا بہترین کھلاڑی قرار دیا گیا۔ویسٹ انڈیز اور آئرلینڈ کے درمیان تین ٹی ٹونٹی میچوں پر مشتمل سیریز کا دوسرا میچ کل ہفتہ کو باسیٹیری کے مقام پر کھیلا جائے گا۔ آئرش ٹیم کو ویسٹ انڈیز کیخلاف سیریز میں 1-0 کی برتری حاصل ہے۔