اسلام آباد (نوائے وقت رپورٹ) وفاقی وزیر قانون فروغ نسیم کا کہنا ہے کہ متحدہ قومی موومنٹ پاکستان (ایم کیو ایم) وزیراعظم عمران خان کو اپنا بھائی سمجھتی ہے کسی صورت حکومت نہیں گرنے دیں گے۔وفاقی وزیر قانون نے انکشاف کرتے ہوئے بتایا کہ جب پاکستان تحریک انصاف کی حکومت آئی تھی تو اس وقت ایم کیو ایم کے ساتھ مذاکرات کے دوران پی ٹی آئی کی طرف سے متحدہ قومی موومنٹ پاکستان کو دو وزارتیں دینے کا وعدہ کیا گیا تھا۔فروغ نسیم کا مزید کہنا تھا کہ ایم کیو ایم کی طرف سے قانون کی وزارت نہیں مانگی گئی تھی، مجھے وزیر قانون بنانا عمران خان کی خواہش تھی۔ان کا مزید کہنا تھا کہ ایم کیو ایم کے سربراہ خالد مقبول نے کہا تھا کہ آپ (فروغ نسیم) وزارت قانون سنبھالیں۔ باقی دو وزارتیں لینے ہمارا معاملہ ہے۔ وفاقی وزیر قانون کا کہنا تھا کہ سوشل میڈیا پر پابندی کیلئے کوئی کالا قانون نہیں لا رہے، سوشل میڈیا سے متعلق ایسے رولز بنا رہے ہیں جو عالمی سطح پر رائج ہیں، فیس بک وفد کو بتایا کہ بھارت کے مقابلے پاکستان سے امتیازی رویہ نہ رکھیں۔