لاہور(سپورٹس رپورٹر+نمائندہ سپورٹس) سابق کپتان محمد حفیظ نے کہا ہے کہ وہ رواں سال آسٹریلیا میں منعقد ہونے والے عالمی کپ میں فٹنس اور فارم کے ساتھ پاکستان کی نمائندگی کر کے انٹرنیشنل کرکٹ کو خیرباد کہنا چاہتا ہوں۔ بنگلہ دیش کے خلاف سیریز کیلئے ٹیم میں واپسی میرے لئے سر پرائز نہیں ہے۔ ٹیم کو مس کر رہا تھا واپسی پر خوشی ہوئی ہے۔ لاہور میں میڈیا سے گفتگو کرتے ہوئے ایم حفیظ کا کہنا تھا کہ سیریز میں باولنگ کو مس کروں گا باولنگ ایکشن ٹیسٹ کیلئے تیار ہوں۔ میں پاکستان کیلئے بطور بلے باز کھیلا ہوں۔ میں کبھی مایوس نہیں بلکہ ہمیشہ پر امید رہتا ہوں اور مثبت سوچتا ہوں۔ میں مثبت سوچ کے ساتھ ٹیم میں آیا ہوں۔ میری کوشش ہوگی کہ جو اعتماد کیا گیا ہے اس پرپورا اتروں اور قومی ٹیم کو فتوحات کی راہ پر گامزن کرنے کیلئے اپنا کردار ادا کروں۔ نوجوان کھلاڑیوں کو اپنے تجربے سے بتاوں گا کہ کس طرح حالات کا مقابلہ کرنا ہے۔ بنگلہ دیش کرکٹ ٹیم کو پاکستان میں خوش آمدید کہتا ہوں۔ اپنے لوگوں کے سامنے کھیلنے کو بے تاب ہوں۔ زیادہ شائقین کرکٹ کو میدان میں آکر کھلاڑیوں کی حوصلہ افزائی کرنی چاہئے۔