لاہور(نمائندہ سپورٹس+نمائندہ سپورٹس ) آئی سی سی انڈر 19 کرکٹ ورلڈکپ 2020 کے گروپ مرحلے کے اختتام پر ،عباس آفریدی، پاکستان انڈر 19 کی جانب سے سب سے زیادہ وکٹیں حاصل کرنے والے باؤلربن گئے، فاٹا سے تعلق رکھنے والے نوجوان آل راؤنڈر، جنوبی افریقہ میں جاری میگا ایونٹ میں اب تک 8 وکٹیں حاصل کرچکے ہیں۔دائیں ہاتھ سے باؤلنگ کرنے والے میڈیم پیسر، عباس آفریدی نے سکواڈ میں شامل طاہر حسین، محمد وسیم اور عامر خان کے ہمراہ سکاٹ لینڈ، زمباوے اور بنگلہ دیش کیخلاف شاندار باؤلنگ کا مظاہرہ کیا۔اب تک ایونٹ میں پاکستان انڈر19 کی جانب سے سب سے زیادہ وکٹیں حاصل کرنے والے عباس آفریدی کی بیٹنگ کرنے کی قابلیت بھی انہیں دیگر کھلاڑیوں سے منفرد بناتی ہے۔ عباس آفریدی کا کہنا ہے کہ تاحال وہ آئی سی سی انڈر 19 کرکٹ ورلڈکپ 2020میں اپنی کارکردگی سے خوش ہیں۔ وہ ایونٹ میں عمدہ کارکردگی کا تسلسل برقرار رکھنے کی کوشش کریں گے۔ ان کا ہدف ایونٹ کا بہترین آل راونڈر بننا ہے تاکہ وہ باؤلنگ اوربیٹنگ دونوں سے ٹیم کو فتح دلاسکیں۔ وہ باؤلنگ میں ورائٹی لانے کی کوشش کرتے ہیں۔ وہ سیم کیساتھ ساتھ سلو گیندکرنے کی صلاحیت رکھتے ہیں جس کے نتائج گذشتہ تینوں میچوں میں دیکھے جاسکتے ہیں۔ افغانستان سے شیڈول میچ پر کہا کہ پاکستان انڈر 19 ٹیم اس سے قبل ایشیا کپ میں حریف ٹیم کو 160 رنز پر ڈھیر کرچکی ہے، انہیں امیدہے کہ میگا ایونٹ میں بھی وہ افغانستان ٹیم کو کم سکور تک محدود رکھیں ۔پاکستان سینئر کرکٹ ٹیم کی نمائندگی کرنے کی خواہش کا اظہار کرتے ہوئے کہاکہ قومی انڈر 19 ٹیم کے ہیڈ کوچ اعجاز احمد اور باؤلنگ کوچ راؤ افتخارکی جانب سے محنت کے نتائج سب کے سامنے ہیں۔ پاکستان آئندہ میچ میں افغانستان کو شکست دیکر سیمی فائنل میں رسائی حاصل کرلے گا۔