لاہور(نمائندہ سپورٹس )پاکستانی سکواش پلیئرز نے دیارغیر میں ملک کا نام روشن کردیا، سابق قومی کپتان سلیم خان کی پوتی فضا خان اور پوتے یوسف خان نے حسن بدرمتحدہ عرب امارات سکواش سیریز2020 ء میں مختلف ٹائٹلز جیت لیے۔یواے ای سکواش سیریز 2020ء میں پاکستان کے جہانگیرخان نے ہم وطن رضوان خان کیخلاف کامیابی سمیٹی، سپرڈویژن میں پاکستانی نعیم خان نے ماریشس کے رابرٹ ٹیٹوٹ کو مات دے دی، فضا خان مسلسل 3 سال سے اس ایونٹ میں فتوحات سمیٹ رہی ہیں جبکہ یوسف خان، نعیم خان اورجہانگیرخان نے پہلی بارکامیابی حاصل کی۔چیمپئن شپ کی دیگر کیٹیگریز بوائز انڈر11 میں بھارت کے میران رائے نے مصری حریف خالد مصطفیٰ کو ہرایا، بوائز انڈر13 میں بھارتی انش اوبرائے نے ہم وطن کیرو بینرجی پر غلبہ پالیا۔ بوائز انڈر15 میں جاپان سے تعلق رکھنے والے نارومی کینو نے بھارتی حریف انش اوبرائے کو شکست دی۔ بوائز انڈر19 میں بھارت کے سمپورن بینرجی نے ہم وطن وشال وینکٹ کو زیر کیا۔ڈویژن 3 میں سوئٹزرلینڈ کے آندرے سیلومی نے بھارتی گورو سماتینی کو ہرایا، ڈویژن2 میں ماریشس کے رابرٹ ٹیٹو نے بھارتی گورو سماتینی پر غلبہ پالیا۔ڈویژن ون کے آل بھارت مقابلے میں راہول موہانی نے سمپورن بینرجی کو مات دی۔دریں اثنا سابق پاکستانی کپتان سلیم خان نے کہا ہے کہ فضا خان سکواش میں آنے والی سب سے زیادہ باصلاحیت جونیئر پلیئر ہیں۔