لاہور(نمائندہ سپورٹس+سپورٹس رپورٹر)سابق کپتان و چیف سلیکٹر معین خان نے پاکستان کرکٹ ٹیم کیلئے کھلاڑیوں کے طریقہ انتخاب کو تنقید کا نشانہ بنایا ہے۔کوئٹہ گلیڈیٹر کے ہیڈ کوچ نے فرنچائز کی تقریب میں ہیڈ کوچ مصباح الحق کا نام لیے بغیر کہا کہ ایسے کھلاڑیوں کو عہدوں پر نہیں ہونا چاہیے جو اپنی بات سمجھا نہ سکیں۔، جب ہار کا ڈر رہے گا تو ہارنا ہی ہے۔ جہاں بچوں کو کھیلانا تھا وہاں سینئرز کو ٹیم میں شامل کیا گیا، موجودہ سلیکشن کمیٹی نے بنگلہ دیش کیخلاف 2 سینئرز کو کم بیک کرایا۔ سرفراز احمد کا پاکستان ٹیم کو بلندی تک لے جانے میں کردار رہا ہے، ان کو قومی سکواڈ سے الگ کرنے کا جو طریقہ کار اپنایا گیا وہ اچھا نہیں تھا، سرفراز احمد کی موجودہ حالات میں پاکستان ون ڈے اور ٹی ٹونٹی ٹیم میں جگہ بنتی ہے، پی ایس ایل فائیو میں سرفراز احمد کیلئے بہترین موقع ہوگا کہ وہ اپنی بھرپور کارکردگی کا مظاہرہ کرکے پاکستان ٹیم میں جگہ بنائیں۔