لاہور (سپورٹس رپورٹر+نمائندہ سپورٹس ) پاکستان اور بنگلہ دیش کی کرکٹ ٹیموں کے درمیان سیریز کے پہلے ٹیسٹ میچ کیلئے ٹکٹوں کی فروخت آج سے شروع ہو گی۔شائقین کرکٹ 7 سے11 فروری تک پنڈی کرکٹ سٹیڈیم میں کھیلے جانے والے ٹیسٹ میچ کیلئے ٹکٹیں ٹی سی ایس کے ایکسپریس سنٹر سے خرید سکتے ہیں، اسلام آباد اور راولپنڈی کے ایکسپریس سینٹرز پر ٹکٹوں کی فروخت منگل کی دوپہر 2 بجے سے شروع ہوگی، 5 فروری کو عام تعطیل کے باوجود پلاٹ نمبر 394/اے، پوٹھوہار روڈ نزد پولیس اسٹیشن، سیکٹر آئی نائن میں واقع ٹی سی ایس ایکسپریس سینٹر میں ٹکٹوں کی فروخت جاری رہے گی۔پی سی بی نے شائقین کرکٹ کو ہدایت کی ہے کہ وہ ٹکٹ خریدتے وقت شناختی کارڈ اپنے ہمراہ رکھیں، ایک شناختی کارڈ پر زیادہ سے زیادہ 5 ٹکٹیں حاصل کی جاسکتی ہیں۔ پی سی بی نے شائقین کرکٹ کی سہولت اور دلچسپی کے پیش نظر ٹکٹوں کے نرخ کم رکھے ہیں۔ راولپنڈی میں شیڈول ٹیسٹ میچ کیلئے اظہر محمود، عمران خان، جاوید اختر اور جاوید میانداد انکلوڑر کے ٹکٹ کی قیمت 100 روپے مقرر کی گئی ہے، اس میچ کیلئے میران بخش، شعیب اختر، سہیل تنویر اور یاسر عرفات انکلوڑرز کے ٹکٹ 50 روپے میں دستیاب ہوں گے۔