اسلام آباد (وقائع نگار خصوصی) جنوبی افریقہ کے سابق صدر نیلسن منڈیلا کے داماد موزی ڈلامنی نے منگل کو پارلیمنٹ ہائوس کا دورہ کیا۔ سینٹ کی مجلس قائمہ برائے اطلاعات و نشریات کے چیئرمین فیصل جاوید نے نیلسن منڈیلا کے داماد کا پارلیمان آمد پر خیرمقدم کیا۔ جنوبی افریقہ کے سینیٹر ماگو دو لیلی بھی نیلسن منڈیلا کے داماد کے ہمراہ تھے۔ ملاقات میں پاکستان اور جنوبی افریقا کے درمیان کرکٹ پر بھی تفصیلی بات چیت ہوئی۔ نیلسن منڈیلا کے داماد نے کہا کہ نیلسن منڈیلا کشمیرکے حوالے سے واضح موقف رکھتے تھے۔ اہل کشمیر کے جذبات سے آگاہ ہیں اور انہیں بخوبی سمجھتے ہیں۔ جنوبی افریقہ کشمیر پر پاکستان کیساتھ ہے۔ موزی ڈلامنی نے اہل کشمیر کی آواز کو اٹھانے کیلئے وزیراعظم کی کاوشوں کو قابل تحسین قرار دیتے ہوئے کہا وزیراعظم کی نیلسن منڈیلا سے ملاقات تاریخی موقع تھا۔ جنوبی افریقہ میں وزیراعظم عمران خان کے بہت سے مداح ہیں۔ جنوبی افریقا کی کرکٹ ٹیم جلد پاکستان کادورہ کریگی۔ اس موقع پر سینیٹر فیصل جاوید کا کہنا تھا کہ وزیراعظم، اہل کشمیر کیلئے نیک جذبات کے اظہار پر شکرگزار ہیں۔ جنوبی افریقہ میں کرکٹ بورڈ کے سربراہ سے ملاقات کا موقع ملا، پاکستان میں کرکٹ شائقین جنوبی افریقہ کی ٹیم کے شدت سے منتظر ہیں۔