لاہور+اسلام آباد(نمائندہ سپورٹس+سپورٹس رپورٹر) پاکستان اور بنگلہ دیش کی کرکٹ ٹیموں کے درمیان دو ٹیسٹ میچوں پر مشتمل سیریز کا پہلا میچ آج جمعہ سے راولپنڈی کرکٹ سٹیڈیم میں شروع ہوگا۔ ٹاس ساڑھے نو بجے ہو گا جبکہ میچ دس بجے شروع ہوگا ، بنگلہ دیش کی ٹیم پہلی بار راولپنڈی کرکٹ سٹیڈیم میں ٹیسٹ میچ کھیلے گی، پاکستان ٹیم کی قیادت اظہر علی کرینگے جبکہ بنگلہ دیشی ٹیم مومن الحق کی قیادت میں میدان میں اترے گی ۔پاکستان کی ٹیسٹ ٹیم کے کپتان اظہر علی نے بنگلہ دیش کیخلاف پہلے ٹیسٹ میچ میں بہترین کارکردگی کا عزم ظاہر کرتے ہوئے کہا ہے کہ مہمان ٹیم سرپرائز کر سکتی ہے اس لیے انہیں آسان تصور نہیں کریں گے۔پاکستان اور بنگلہ دیش کے درمیان دو ٹیسٹ میچوں کی سیریز کا پہلا میچ کل سے راولپنڈی میں کھیلا جائے گا اور سیریز کے لیے ٹرافی کی رونمائی کردی گئی ہے۔میچ سے قبل جمعرات کو راولپنڈی کرکٹ سٹیڈیم میں پریس کانفرنس سے خطاب کرتے ہوئے اظہر علی نے کہا کہ سری لنکا کے خلاف راولپنڈی ٹیسٹ بہت اچھا تھا اور اس میچ کے آخری دن لوگوں کی بڑی تعداد سٹیڈیم میں میچ دیکھنے کے لیے آئی تھی، اس میچ کا نتیجہ نہیں آ رہا تھا لیکن اپنے گراؤنڈ آباد اور تماشائیوں واپس دیکھ کر بہت خوشی محسوس ہورہی تھی۔انہوں نے روالپنڈی کے عوام سے گزارش کی کہ جس طرح انہوں نے سری لنکا کے خلاف ٹیسٹ میچ میں سپورٹ کیا تھا، بالکل اسی طرح آ کر سپورٹ کریں اور دنیا کو پیغام دیں کہ ہم کرکٹ سے کتنا پیار کرتے ہیں۔ پاکستان کی موجودہ ٹیم میں بے پناہ صلاحیت ہے لیکن فتح وہی ٹیم حاصل کرتی ہے جو میدان میں اچھی کارکردگی کا مظاہرہ کرتی ہے لہٰذا فتح کے لیے ہمیں اچھی کارکردگی کا مظاہرہ کرنا ہو گا۔ فواد عالم اپنی کارکردگی کی بنیاد پر سکواڈ میں آئے ہیں اور سکواڈ میں موجود تمام ہی افراد کسی بھی موقع پر فائنل الیون میں آ سکتے ہیں، صرف فواد عالم ہی نہیں بلکہ ٹیم میں موجود کھلاڑیوں کو جب بھی موقع ملے گا تو امید ہے کہ وہ بہترین کارکردگی دکھائیں گے۔انہوں نے فہیم اشرف کی سکواڈ میں شمولیت کا دفاع کرتے ہوئے کہا کہ ہم اپنا باؤلنگ اٹیک جس طرح تیار کر رہے ہیں تو ہماری نظریں ایک فاسٹ باؤلنگ آل راؤنڈر کی تیاری پر مرکوز ہیں تاکہ وہ ہمیں چوتھے فاسٹ باؤلر کے طور پر مدد کر سکے۔ بیرون ملک کھیلتے ہوئے ایک چوتھے فاسٹ باؤلر کی مدد درکار ہوتی ہے کیونکہ اگر تین فاسٹ باؤلر کھیل رہے ہوں تو انہیں بار بار آنا پڑتا ہے جس سے وہ جلد تھک جاتے ہیں ۔ ٹیسٹ میچ جیتنا کبھی بھی آسان نہیں ہوتا، ٹیسٹ میچ کھیلتے ہوئے بہترین کھیل پیش کرنا ہوتا ہے۔ بنگلہ دیش کی ٹیم بہت اچھی ہے اور ہمیں سرپرائز کر سکتی ہے ، ان کی ٹیم میں میچز ونرز بھی ہیں لہٰذا ہم انہیں آسان تصور نہیں کر رہے، ہماری باؤلنگ مخالف ٹیموں کے لیے خطرہ بن سکتی ہے۔بنگلہ دیش ٹیم کے کپتان مومن الحق کا کہنا ہے کہ پاکستان کیخلاف جیت کی لگن سے میدان میں اتریں گے۔ ہم ہر شعبے میں بہتر کارکردگی کا مظاہرہ کریں گے اور پاکستان کیخلاف جیت کی لگن سے میدان میں اتریں گے۔ کھلاڑی کاکردگی دکھانے کیلئے پر عزم ہیں ۔ کوشش ہوگی اچھا کھیل پیش کریں ۔ ٹی ٹونٹی سیریز میں شکست کو بھلا کر میدان میں اتریں گے ۔ سکیورٹی کا کوئی خوف نہیں ‘تمام تر توجہ کھیل کی طرف ہو گی ۔ ذرائع کے مطابق بنگلہ دیش کیخلاف فہیم اشرف اور بلال آصف کو کھلایا جائے گا جبکہ آل راؤنڈر فواد عالم پلیئنگ الیون کا حصہ نہیں ہوں گے۔