لاہور( سپورٹس رپورٹر+نمائندہ سپورٹس)قومی کرکٹر اورسابق ٹیسٹ کپتان سرفراز احمد نے کہا ہے کہ پاکستان ون ڈے کرکٹ ٹیم میں منتخب ہونا یا نہ ہونا قسمت کی بات ہے، اس وقت میری تمام تر توجہ پی ایس ایل فائیو پر مرکوز ہے۔یہ بات انہوں نے کوئٹہ گلیڈی ایٹرز کی اپنے سپانسر کے ساتھ مفاہمت کی یادداشت پر دستخط کرنے کی تقریب کے موقع پر میڈیا سے گفتگو کرتے ہوئے کہی۔پی ایس ایل فائیو میں اپنے اعزاز کا دفاع کرنے والی کوئٹہ گلیڈی ایٹرز کے کپتان سرفراز احمد کا کہنا تھا کہ میں بھرپور محنت کر رہا ہوں، ٹائٹل کو برقرار رکھنے کی کوشش کریں گے، کامیابی کا دعویٰ نہیں کرتے لیکن امید یہ ہے کہ بہترین کارکردگی کا مظاہرہ کریں گے۔فرنچائز کے مالک ندیم عمر نے کہا کہ پی ایس ایل فائیو میں اپنے اعزاز کا دفاع کرنے کیلئے پرامید ہیں، پوری قوم کو پی ایس ایل 5 کا انتظار ہے اور اس کی توجہ اور نگاہیں لیگ پر جمی ہیں، امید ہے کہ کراچی میں افتتاحی تقریب بہت شاندار رہے گی اور شائقین کرکٹ کی ایک بڑی تعداد سٹیڈیم کا رخ کرے گی۔