لاہور(نمائندہ سپورٹس +سپورٹس رپورٹر )ورلڈ چیمپئن محمد آصف مسلسل تیسری بار قومی سنوکر چیمپئن بن گئے۔کراچی میں ہونے والی45 ویں قومی اسنوکر چیمپئن شپ میں محمد آصف نے شاہد آفتاب کو سنسنی خیز مقابلے کے بعد 7-8 سے شکست دے کر ٹائٹل اپنے نام کرلیا۔قومی سنوکر چیمپئن شپ کا فائنل 15فریمز پر مشتمل تھا جبکہ فائنل مقابلہ 6 گھنٹے تک جاری رہا۔ شاہدآفتاب نے ابتدا سے ہی اچھے کھیل کا مظاہرہ کرتے ہوئے آصف کو دباؤمیں رکھا، انہوں نے 5 مسلسل فریمز جیت کر آصف پر 2-6 کی برتری حاصل کرلی۔ آصف نے 2 فریمز جیت کر خسارہ کم کیا لیکن 11 واں فریم شاہد نے اپنے نام کرکے سکور 4-7 کردیا۔عالمی چیمپئن محمدآصف نے مسلسل 4 فریمز جیت کرنیشنل ٹائٹل اپنے نام کرلیا۔ محمد آصف نے گذشتہ سال نومبر میں آئی بی ایس ایف ورلڈ سنوکر چیمپئن شپ کا ٹائٹل اپنے نام کیا تھا، اس سے قبل 2012 میں بھی انہوں نے ورلڈ چیمپئن شپ جیتی تھی۔