پشاور ‘ ٹانک (نوائے وقت رپورٹ) سکیورٹی فورسز نے پشاور اور ٹانک میں دو کارروائیوں کے دوران 7دہشتگرد ہلاک کر دیئے۔ آپریشن مصدقہ اطلاعات پر کئے گئے۔ تفصیلات کے مطابق پشاور کے علاقے شکئی میں سی ٹی ڈی نے آپریشن کے دوران 5دہشتگردوں کو ہلاک کر دیا۔ سی ٹی ڈی ایکی کے علاقے میں آپریشن کیا۔ آپریشن کے دوران سی ٹی ڈی اور دہشتگردوں میں فائرنگ کا تبادلہ ہوا۔ ہلاک دہشتگردوں سے خودکش جیکٹس برآمد کر لی گئیں۔ آپریشن بم ڈسپوزل یونٹ طلب کر لیا گیا جبکہ پولیس اور حساس اداروں نے علاقے کو گھیرے میں لے لیا۔ٹانک کے نواحی گاؤں رغزائے میں سکیورٹی فورسز کے آپریشن میں کالعدم تنظیم کے 2 دہشت گرد ہلاک ہوگئے۔ سکیورٹی ذرائع کے مطابق ٹانک کے نواحی گاؤں رغزائے میں مصدقہ اطلاعات پر آپریشن کیا گیا اور کارروائی کے دوران دہشت گردوں سے فائرنگ کا تبادلہ ہوگیا جس کے نتیجے میں 2 دہشت گرد مارے گئے۔ سکیورٹی حکام کا کہنا ہے کہ ہلاک دہشت گردوں کی شناخت انس عرف منیر اور بخت اللہ کے نام سے ہوئی ہے، دونوں کا تعلق کالعدم تنظیم سے ہے اور دونوں سکیورٹی اداروں پر کئی حملوں میں ملوث رہ چکے ہیں۔