اسلام آباد (وقائع نگار خصوصی) وزیراعظم عمران خان کی معاون خصوصی برائے اطلاعات و نشریا ت ڈاکٹر فردوس عاشق اعوان نے کہا ہے کہ عوامی احساس کا دائرہ مسلسل بڑھ رہا ہے، احساس پروگرام اب لیہ میں شروع کیا جا رہا ہے، احساس آمدن پروگرام سے پسماندہ علاقوں کے غریب اور مستحق لوگوں کی مدد ہوگی، ان کے معیار زندگی کو بہتر بنانے میں احساس ایک اہم سنگ میل ثابت ہو رہا ہے، احساس صحت مند اور روشن معاشرے کا بنیادی عنصر ہوتا ہے۔ سماجی رابطے کی ویب سائٹ ٹوئٹر پر اپنے بیان میں انہوں نے کہا یہ پروگرام عمران خان کی محروم اور پسے ہوئے طبقات کے ساتھ محبت، وابستگی اور ہمدردی کا مظہر ہے۔ فردوس عاشق اعوان نے کہا ہے کہ پی ایس ایل کی افتتاحی تقریب نے روشنیوں کے شہر کو نئی آب و تاب دی ہے، یہ لمحے، یہ خوشیاں، یہ رونقیں قوم بالخصوص کراچی کو مبارک ہوں، دہشت گردی کے خلاف ثابت قدمی دکھانے اور قربانیاں دینے والی قوم کا حق ہے کہ اس کے کھیل کے میدان آباد ہوں۔ ٹویٹ میں ڈاکٹر فردوس عاشق نے کہاکہ یہ پاکستان کے بہادرعوام ، مسلح افواج، پولیس اور قانون نافذ کرنے والے اداروں کی لازوال قربانیوں اور مزاحمت کا ثمر ہے۔ انہوں نے کہا کہ رونقیں بحال ہوئیں، میدان سجے اور بین الاقوامی ستارے پاکسان آئے، بیرون ملک سے آنے والے تمام کھلاڑیوں کو تہہ دل سے خوش آمدید کہتے ہیں۔