لاہور(نمائندہ سپورٹس )کامران اکمل نے کوئٹہ گلیڈی ایٹرز کے خلاف پاکستان سپر لیگ فائیو کی پہلی اور پی ایس ایل میں مجموعی طور پر اپنی تیسری سنچری بناڈالی۔کراچی میں پشاور زلمی کے کامران اکمل نے کوئٹہ گلیڈی ایٹرز کیخلاف 55 گیندوں پر 101 رنز بنائے۔پی ایس ایل کے تمام ایڈیشنز میں یہ چھٹی سنچری سکور کی گئی ہے۔ کامران اکمل لیگ میں سب سے زیادہ چھکے لگانیوالے کھلاڑی بن گئے‘ مجموعی تعداد 73 ہوگئی۔ شین واٹسن 66 کیساتھ دوسرے اور آصف علی 46 کیساتھ تیسرے نمبر پر ہیں۔کامران اکمل نے کہا کہ میرا فوکس میری کارکردگی پر ہوتا ہے، باقی سلیکٹرز کا کام ہے۔عمر اکمل پر ابھی کوئی فیصلہ نہیں آیا، جب فیصلہ آجائے پھر جو کہنا ہے کہہ لیں، وہ میرا بھائی ہے، مجھے معلوم ہے، وہ ایسا نہیں، ابھی تحقیقات ہورہی ہیں، وہ ہوجانے دیں۔انہوں نے کہا کہ مجھے یقین ہے عمر اکمل ویسا ہی کلیئر ہوگا جیسا دس سال پہلے ہوا۔