لاہور(اشرف چودھری )پاکستان سپر لیگ میں اسلام آباد یونائٹیڈ نے لاہور جبکہ کوئٹہ نے کراچی کو ہر ادیا۔اسلام آباد یونائٹیڈ نے لاہور قلندرز کو ایک وکٹ سے ہرا دیا‘فاتح ٹیم نے ٹاس جیت کر فیلڈنگ کا فیصلہ کیا۔قذافی سٹیڈیم میں کھیلے گئے میچ میں لاہور قلندرز نے 6وکٹوں پر 182رنز بنائے ۔ محمد حفیظ نے ناٹ آئوٹ 98رنز بنائے ۔ فخر زمان 33رنز بناسکے ۔ شاداب خان اور فہیم اشرف نے دو دو کھلاڑیوں کو آئوٹ کیا ۔ اسلام آباد یونائٹیڈ کی ٹیم نے ہدف 9وکٹوں پرپورا کرلیا ۔کپتان شاداب خان 52اور کولن انگرام 30رنز بناکر نمایاں رہے ۔ شاہین شاہ آفریدی نے 18رنز دیکر 4کھلاڑیوں کو آئوٹ کیا۔شاداب خان کو میچ کابہترین کھلاڑی قرار دیا گیا۔ احمد سیفی عبداللہ نے ٹی ٹونٹی ڈیبیو کیا ۔ کوئٹہ گلیڈی ایٹرز نے کپتان سرفراز احمد اور نوجوان بلے باز اعظم خان کی شاندار بیٹنگ کی بدولت کراچی کنگز کو 5 وکٹوں سے شکست دیدی۔ نیشنل سٹیڈیم کراچی میں کھیلے گئے میچ میں کراچی کنگز کے کپتان عماد وسیم نے ٹاس جیت کر پہلے بیٹنگ کرنے کا فیصلہ کیا۔کنگز نے مقررہ 20 اوورز میں 9 وکٹوں کے نقصان پر 156 رنز بنائے تھے۔ ہوم ٹیم کی جانب سے کوئی بھی کھلاڑی بڑی اننگز کھیلنے میں کامیاب نہ ہوسکا، تاہم تمام کھلاڑیوں کی اوسط بیٹنگ کے باوجود کراچی کنگز کی ٹیم 150 رنز کا ہندسہ عبور کرنے میں کامیاب ہوئی۔ ایلکس ہیلز 29، بابر اعظم 26، افتخار احمد 25 اور کیمرون ڈیلپورٹ 22 رنز کے ساتھ نمایاں رہے۔کوئٹہ گلیڈی ایٹرز کی جانب سے محمد حسنین نے 3، ٹائمل ملز نے 2 جبکہ سہیل خان اور محمد نواز نے ایک ایک وکٹ حاصل کی۔ہدف کے تعاقب میں شین واٹسن اور جیسن رائے نے اچھا ا?غاز فراہم کیا۔41 کے مجموعے پر شین واٹسن آؤٹ ہوئے تو جیسن رائے بھی 54 اور احمد شہزاد 55 کے مجموعے پر پویلین لوٹ گئے۔تین وکٹیں گنوانے کے بعد کپتان سرفراز احمد اور نوجوان اعظم خان نے ٹیم کو سیزن کی دوسری کامیابی کی جانب بڑھایا۔ اعظم خان نے 46 رنز کی دھواں دھار اننگز کھیلی جبکہ سرفراز احمد 37 رنز بنا کر ناٹ آؤٹ رہے۔ میچ سنسنی خیز لمحات میں داخل ہوا تو 19ویں اوور کی آخری گیند پر آل راؤنڈر انور علی نے چھکا لگا کر ٹیم کو فتح دلوادی۔کراچی کنگز کی جانب سے عماد وسیم اور کرس جورڈن ایک ایک وکٹ لینے میں کامیاب ہوئے جبکہ کوئٹہ کے دیگر 3 کھلاڑی رن آؤٹ ہوئے۔