لاہور (نیوز رپورٹر) حمزہ شہباز نے اسمبلی کے باہر میڈیا سے گفتگو میں کہا ہے کہ سیاست میں جو شائستگی کا سفر کیا تھا اس کو برقرار رہنا چاہئے۔ اﷲ تعالیٰ سب کے والدین کو صحت عطا فرمائے۔ نواز شریف کی اس ملک کے لئے بڑی خدمات ہیں‘ شہباز شریف نے کہا تھا میثاق معیشت کر لیں‘ مہنگائی کی وجہ عوام کی زندگی اجیرن ہو گئی۔ بلاول بھٹو نے میاں نواز شریف کے حوالے سے جو بات کی ہے وہ نہ کرتے تو اچھا تھا۔ نواز شریف علاج کے لئے بیرون ملک گئے ہوئے ہیں، طبیعت سیریس خراب ہے جب آصف زرداری بیمار تھے میں ان کی صحت یابی کے لئے دعا کرتا تھا۔ صوبے میں مہنگائی عروج پر ہے۔ آٹے دال سبزیوں کی قیمتیں آسمان پر ہیں۔ آٹا بحران کے بعد چینی کا بحران بھی سر پر ہے۔ کنٹینر پر کئے گئے بلند و بانگ دعوے عوام تلاش کرتے ہیں جو ڈھونڈنے سے بھی نہیں مل رہے۔ 18 ماہ صرف حکومتی بیان بازی ہوئی ہے۔ انہوں نے کہا کہ غریب آدمی روٹی کو ترس رہا ہے۔ نئے پاکستان کے نعرے پر لوگ ماتم کر رہے ہیں اور پرانے پاکستان کو ڈھونڈ رہے ہیں۔