لاہور (سپورٹس رپورٹر+نمائندہ سپورٹس) لاہور قلندرز کے خلاف ایک وکٹ سے کامیابی حاصل کرنے والے اسلام آباد یونائیٹڈ کے احمد صفی عبداللہ نے کامیابی کا اصل راز بتا دیا۔لاہور قلندرز کے خلاف فتح کے بعد قذافی سٹیڈیم میں پریس کانفرنس کے دوران احمد صفی عبداللہ کا کہنا تھا کہ بیٹنگ کے دوران مسلسل درود شریف بھی پڑھ رہا تھا اللہ تعالی کا شکر گزار ہوں کہ جس نے مجھے اتنی عزت سے نوازا‘ہم اپنے پلان کے مطابق کھیلے جس سے ہمیں مشکل صورت حال کے باوجود کامیا بی حاصل ہوئے۔پی ایس ایل میں اپنا پہلا میچ کھیلنے والے نوجوان آل رائونڈر احمد عبداللہ صفی کا قذافی اسٹیڈیم میں میڈیا سے گفتگو کرتے ہوئے کہنا تھا کہ نو وکٹیں گرنے کے باوجود مجھے اپنے اپنے ساتھ ساتھ محمد موسی پر اعتماد تھا کہ ہم ہدف حاصل کرلیں گے ہم نے دونوں نے فیصلہ کیا تھا کہ آخری گیند تک جانا ہے تو ہم اس میں کامیاب ہوئے اور میچ بھی جیت لیا،احمد صفی کا کہنا تھا کہ آخری دو تین اوور ز میں لاہور قلندرز کے باولرز نے ہمیں آئوٹ کرنے کی کوشش نہیں کی جو کہ ہماری کامیا بی کا باعث بنی۔اب اسلام آباد یونائیٹڈ کی ٹیم اپنے میچز کے لئے روالپنڈی جارہی ہے جو کہ ہمارا ہوم گرائونڈ بھی ہے پنڈی کے باسیوں سے اپیل ہے کہ وہ بڑی تعداد میں اسٹیڈیم آکر کھلاڑیوں کی حوصلہ افزائی کریں۔پی ایس ایل میں اپنے پہلے میچ میں عمدہ کاکردگی پر احمد صفی کا کہنا تھا کہ وہ اچھا پر فارم کرنے پر بے حد خوش ہیں اور کوشش کریں گے کارکردگی کو مزید بہتربنائیں۔