لاہور(سپورٹس رپورٹر)لاہور قلندرز کے کپتان سہیل اختر نے پی ایس ایل فائیو کے اہم میچ میں اسلام آباد یونائیٹڈ کے ہاتھوں شکست پر افسوس کا اظہار کرتے ہوئے کہا کہ مجموعی طور پر ٹیم نے بہترین کارکردگی کا مظاہرہ کیا۔قذافی اسٹیڈیم میں میڈیا سے گفتگو کرتے ہوئے سہیل اختر نے کہا کہ اسلام آباد یونائیٹڈ کے خلاف ٹیم نے مجموعی طور پر اچھی کارکردگی کا مظاہرہ کیا مگر بدقسمتی سے میچ میں کامیابی حاصل نہ کرسکے۔محمد حفیظ نے بہت عمدہ بلے بازی کی میرے خیال میں اس وقت محمد حفیظ بابر اعظم کے بعد پاکستان کے سب سے کامیاب بلے باز ہیں۔سہیل اختر نے کہا کہ اسلام آباد یونائیٹڈکے خلاف آخری اوورز میں ہمارے باولر پلان کے مطابق باؤلنگ نہیں کرپائے۔کوشش کریں گے کہ آئندہ میچز میں بہترین حکمت عملی کے ساتھ میدان میں اترتے ہوئے کا میابی حاصل کریں۔