لاہور(سپورٹس رپورٹر+نمائندہ سپورٹس)پاکستان سپر لیگ کے 18 ویں میچ میں پشاور زلمی نے بارش سے متاثرہ میچ میں کوئٹہ گلیڈی ایٹرز کو 30 رنز سے شکست دیدی۔ ٹاس راولپنڈی میں بارش اور گیلی آؤٹ فیلڈ کے سبب تاخیر سے ہوا اور میچ کو 15اوورز فی اننگز تک محدود کردیا گیا۔راولپنڈی کرکٹ سٹیڈیم میں دفاعی چیمپیئن کوئٹہ گلیڈی ایٹرز نے پشاور زلمی کے خلاف ٹاس جیت کر پہلے باؤلنگ کا فیصلہ کیا۔پشاور زلمی نے اننگز کا آغاز کیا تو ایونٹ میں پہلا میچ کھیلنے والے امام الحق کچھ خاص کارکردگی دکھائے بغیر ہی پویلین لوٹ گئے۔دوسری وکٹ کے لیے کامران اکمل اور حیدر علی نے 30رنز جوڑے لیکن وکٹ کیپر بلے باز محمد حسنین کو دو چھکے لگانے کے بعد تیسری گیند پر انہی کو وکٹ دے بیٹھے۔ حیدر کا ساتھ دینے شعیب ملک آئے اور دونوں نے 54رنز کی شراکت قائم کی۔حیدر 24 گیندوں پر 39رنز بنانے کے بعد حسنین کی دوسری وکٹ بن گئے جبکہ لیونگسٹن بھی 12رنز ہی بنانے میں کامیاب ہو سکے۔دوسرے اینڈ سے شعیب ملک نے جارحانہ بیٹنگ کا سلسلہ جاری رکھا اور اپنی ٹیم کے بڑے مجموعے کی بنیاد رکھی۔شعیب ملک 27گیندوں پر 8 چوکوں اور ایک چھکے سے مزین 54رنز کی اننگز کھیلنے کے بعد محمد حسنین کی چوتھی وکٹ بنے جبکہ لیام ڈاسن گولڈن ڈک کا شکار ہوئے۔پشاور زلمی نے 6وکٹوں کے نقصان پر 170رنز کا مجموعہ سکور بورڈ کی زینت بنایا۔ محمد حسنین 4وکٹیں لے کر سب سے کامیاب باؤلر رہے۔سہیل خان اور بین کٹنگ نے ایک ایک کھلاڑی کو آؤٹ کیا۔171رنز کے تعاقب میں جیسن روئے اور شین واٹسن نے 45 رنز کا جارحانہ آغاز کیا جس کو حسن علی نے روکا جب واٹسن 19 رنز بنا کر آوٹ ہوئے۔ جیسن روئے 5 چوکوں اور 2 چھکوں کی مدد سے 26 گیندوں پر 45 رنز بنائے اور 75 کے سکور پر یاسر شاہ کی اچھی گیند پر آوٹ ہوگئے۔احمد شہزاد ایک مرتبہ پھر ناکام ہوئے اور 17 گیندوں پرصرف 10 رنز بنا کر وہاب ریاض کی وکٹ بن گئے جبکہ بین کٹنگ کی اننگز بھی 17 رنز پر وہاب ریاض کی گیند پر ختم ہوگئی۔اعظم خان کو راحت علی نے 103 کے سکور پر کھاتے کھولے بغیر پویلین بھیج دیا۔محمد نواز راحت علی کی گیند پر آوٹ ہوئے، انہوں نے 7 گیندوں پر 18 رنز بنائے۔ وہاب ریاض نے ٹیم کو ساتویں کامیابی دلائی اور 117 رنز پر گلیڈی ایٹرز کے کپتان سرفراز احمد کی وکٹیں اڑا دیں۔وہ ایک رن بناسکے ۔ سہیل خان سولہ اور تامل ملز چار رنز پر ناٹ آئوٹ رہے۔کوئٹہ گلیڈی ایٹرز کی ٹیم 7وکٹوںپر140رنز بناسکی ۔ وہاب ریاض نے تین ‘راحت علی نے دو جبکہ حسن علی اور یاسر شاہ نے ایک ایک کھلاڑی کو آئوٹ کیا ۔ گلیڈی ایٹرز نے ٹیم میں دو تبدیلیاں کرتے ہوئے فاسٹ باؤلر سہیل خان اور ٹائمل ملز کو فائنل الیون کا حصہ بنایا ہے۔پشاور زلمی نے بھی ٹیم میں دو تبدیلیاں کرتے ہوئے امام الحق اور لیام ڈاسن کو ٹیم میں شامل کیا ہے۔