اسلام آباد /سٹاف رپورٹر/پاک بحریہ کے سر براہ ایڈمرل ظفر محمود عباسی نے کہا ہے کہ پاک بحریہ سمندری حفاظتی چیلنجوں سے نمٹنے کے لئے ہمہ وقت تیار ہے۔ موجودہ وقت کی مشکلات، درپیش پیچیدہ سکیورٹی ماحول سے نمٹنے کے لئے تیار رہنا چاہئے۔ آج کی جنگ میں کو ئی بھی قوت اکیلے کامیابی حاصل نہیںکرسکتی۔ لہذا مشترکہ فوجی طاقت ہی آج کے دور کی اہم ضرورت ہے۔ انہوں نے ان خیالات کا اظہار پاکستان ائیر فورس ائیر وار کالج کے دورہ کے موقع پر خطاب کرتے ہوئے کیا، ان کی آمد پرائیر وائس مارشل ذوالفقار احمد، کمانڈنٹ ائیر وار کالج نے ان کا استقبال کیا۔ نیول چیف نے ائیر وار کورس کے شرکاء سے خطاب کرتے ہوئے ملکی دفاع میں پاک فضائیہ کے کردار اور قر بانیوں کو زبردست خراج تحسین پیش کیا۔ انہوں نے کہا کہ ہمیں اْبھرتے ہوئے رجحانات کا جائزہ لینا چاہئے اور انہوں نے مزید کہا کہ نیول چیف نے اپنے دورے کے دوران ائیر وار کالج میں زیرتربیت غیر ملکی افسران سے بھی ملاقات کی۔