لاہور+نارنگ منڈی+شیخوپورہ(نامہ نگاران+نمائندہ نوائے وقت ) رنگ روڈ پر تیز رفتار ٹریکٹرٹرالراورکارمیں تصادم کے نتیجے میں کارسوار 25 سالہ زاہد اور23 سالہ صفیہ بی بی جاں بحق ہو گئے ہیں۔اطلاع پر پولیس نے موقع پر پہنچ کردونوں نعشیں قبضے میں لیکر پوسٹ مارٹم کیلئے مردہ خانے جمع کرادی ہیں۔ ادھرنارنگ منڈی کے رہائشی خالد خطائیاں والا کی بیوی رقیہ بی بی میاں چنوں سے واپس نارنگ منڈی آ رہی تھی کہ مخالف سمت سے آنیوالی گاڑی کی ٹکر سے کار سوار رقیہ بی بی اور ڈرائیور ہلاک ہو گئے۔ ادھرشیخوپورہ سرگودھا سے لاہور جانے والی کار کو موٹروے انٹر چینج ہرن مینار کے قریب نامعلوم گاڑی نے ٹکر ماردی ، کار قلابازیاں کھاتی ہوئی ڈیوائیڈر سے جاٹکرائی اور حادثہ میں12سالہ بچے سمیت 2افراد موقعہ پر ہی جاں بحق ہوگئے جبکہ ایک شدید زخمی ہونے والے شخص کو ڈی ایچ کیوہسپتال شیخوپورہ سے لاہور جنرل ہسپتال میں منتقل کردیا گیا ہے۔ زخمی شخص کی شناخت الیاس کے نام سے ہوئی جو بھلوال کا رہائشی ہے، جاں بحق ہو نے والے شخص کی شناخت55سالہ سلطان محمود کے نام سے ہوئی جو جلو پارک لاہور کینٹ سے ہے جس کی نعش کو ورثامحمد سعید وغیرہ نے شناخت کرلیا۔ پولیس کے مطابق بچے کی شناخت نہ ہوسکی جس کے باعث بچے کی نعش کو مردہ خانہ میں منتقل کردیا گیا ہے۔