اسلام آباد (سٹاف رپورٹر) شمالی وزیرستان میں ایک کارروائی کے دوران 9 دہشت گردوں کو ہلاک اور ایک کو گرفتار کر لیا گیا جب کہ دو سپاہیوں نے جام شہادت نوش کیا۔ علاقے میں سرچ آپریشن کے دوران دہشت گردوں کے ٹھکانوں سے اسلحہ اور گولہ بارود کی بھاری مقدار بھی برآمد کر لی گئی۔ آئی ایس پی آر کے مطابق شمالی وزیرستان کے علاقوں خیسورا اور دوسالی میں دہشت گردوں کی موجودگی کے بارے میں مصدقہ انٹیلی جنس اطلاعات کی بنیاد پر یہ آپریشن کیا گیا۔ اس دوران فائرنگ کا تبادلہ ہوا جس میں 9 دہشت گرد ہلاک ہو گئے جب کہ ایک کو گرفتار کر لیا گیا۔ دو سپاہیوں نے جام شہادت نوش کیا۔ شہید ہونے والے 29 سالہ لانس نائیک عبدالوحید کا تعلق مظفرآباد سے تھا جن کے پسماندگان میں بیوہ‘ 3 بیٹے اور ایک بیٹی شامل ہے جبکہ 33 سالہ شہید سپاہی سکم داد کا تعلق ایبٹ آباد کے ایک گاؤں تاجوال سے تھا اور انہوں نے پسماندگان میں ایک بیٹا اور بیٹی سوگوار چھوڑے ہیں۔