لاہور(نمائندہ سپورٹس +سپورٹس رپورٹر)مدرز ڈے کے موقع پر قومی کھلاڑیوں نے اپنی ماوں کو محبت بھرے الفاظ میں خراج تحسین پیش کیا۔بابر اعظم نے کہا کہ انہوں نے اپنا پہلا بلّا 1500 روپے میں خریدا تھا جو ان کی ماں کی کل جمع پونجی تھی۔ ماما جی نے انہیں بلّا خریدنے کیلئے سب پیسے دے دیے تھے۔ اپنی ماوں کی قدر کریں، جنت ماں کے قدموں تلے ہے۔کرکٹر حسن علی نے کہا کہ مدرز ڈے بہت بہت مبارک ہو، امی جان میرے زندگی میں سب کچھ کرنے کیلئے آپ کا بہت شکریہ۔کامران اکمل نے کہا کہ والدہ کو بہت یادکر رہا ہوں، جب وہ میرے پاس تھیں تو روز مدر ڈے ہوتا تھا۔ اپنے والدین کی قدر کریں، ان کی عزت کریں، وہ اسی کی حقدار ہیں۔کرکٹر اظہر محمود نے کہا کہ کیا رہ گیا جہاں میں جب ماں ہی نہیں رہی، ایسا لگا جسم میں جان ہی نہیں رہی۔ویمن کرکٹر سدرہ امین نے کہا کہ ماوں کا بچوں کی زندگیوں پر جو اثر ہوتا ہے، اس کا کوئی جوڑ نہیں۔