شیخوپورہ واقعہ: 6 مقتولین کھاریانوالہ‘ 2 شرقپور میں سپرد خاک‘ رقت آمیز مناظر
شیخوپورہ (نمائندہ نوائے وقت) قصبہ کھاریانوالہ میں گزشتہ روز قتل ہونیوالے 8افراد کے قتل کے الزام میں پولیس نے دو ملزموں نعیم شاہ وغیرہ کو گرفتار کر لیا ہے جبکہ باقی ملزموں کی گرفتاری کیلئے تین ٹیمیں تشکیل دیدی گئی ہیں جو ملزمان کو تلاش اور مقدمہ کے مختلف پہلوئوں کا جائزہ لے رہی ہیں۔ دریں اثناء بچوں کی معمولی لڑائی کی بناء پر قتل ہونیوالے 8افراد کو کھارانوالہ اور شرقپور کے علاقہ ماہ دیوی کے قبرستان میں سپرد خاک کر دیا گیا۔ اس موقع پر پولیس کی بھاری نفری موجود تھی، دو مقتولین کو شرقپور کے علاقہ ماہ دیوی کے قبرستان میں سپرد خاک کیا گیا ہے۔ اس موقع پر کئی رقت آمیز مناظر بھی دیکھنے میں آئے۔ مقتولین کے ورثاء دھاڑیں مار مار کر روتے رہے۔
