کراچی (نیٹ نیوز) ترجمان سندھ حکومت مرتضیٰ وہاب کا کہنا ہے کہ پیپلز پارٹی تعصب پر مبنی پالیسی نہیں رکھتی لیکن وفاقی حکومت سے تعصب کی بو آتی ہے۔کراچی میں پریس کانفرنس کے دوران مرتضیٰ وہاب نے کہا کہ پی ٹی آئی کبھی حقائق پر بات نہیں کرتی، صرف الزامات لگاتے ہیں اور چلے جاتے ہیں، پی ٹی آئی والے آج کل محکمہ صحت سندھ کے پیچھے پڑے ہیں۔ کبھی ان لوگوں نے بجٹ کتاب پڑھی ہوتی تو سوال نہیں اٹھاتے۔ پبلک پرائیویٹ پارٹنرشپ کی مثال پیپلز پارٹی دور میں آئی، سندھ کے ہسپتالوں میں ملک بھر کے مریضوں کا علاج مفت ہوتا ہے۔ اٹھارہویں ترمیم کے بعد ادارہ امراض قلب کیلیے 11ارب کا بجٹ مختص کیا، گمبٹ انسٹی ٹیوٹ آف میڈیکل سائنسز میں 196 افراد کا مفت لیور ٹرانسپلانٹ ہوا۔ سندھ کے ہسپتال مہنگے ترین علاج مفت فراہم کررہے ہیں۔ سندھ میں علاج کرانے والے 30 فیصد افراد کا تعلق صوبہ پنجاب سے ہے۔ مرتضیٰ وہاب نے کہا کہ سندھ حکومت کو ہر دن تنقید کا نشانہ بنایا جا رہا ہے۔ وفاقی حکومت سے تعصب کی بو آتی ہے۔ وزیراعظم خیبر پی کے پنجاب اور بلوچستان کا دورہ کرتے ہیں لیکن سندھ کا نہیں۔