لاہور (نیٹ نیوز) وزیراعظم عمران خان کی کوششوں سے ملائشیا کی جیلوں میں قید سینکڑوں پاکستانی وطن واپس پہنچ گئے۔ ملائشیا کی جیلوں میں قید 250 پاکستانی قیدی ملائشین ائرلائن کے ذریعہ لاہور علامہ اقبال انٹر نیشنل ائرپورٹ پر پہنچے۔ وطن واپس پہنچ کر قیدی بہت خوش دکھائی دیئے۔ تمام کو سکریننگ کے بعد قرنطینہ میں رکھا گیا ہے۔ دوسری جانب ملائیشیا سے مزید 167 پاکستانی لاہور پہنچ گئے جنہیں امیگریشن کے بعد قرنطینہ میں منتقل کر دیا جائے گا۔ ملائیشیا میں تعینات پاکستانی ہائی کمشنر آمنہ بلوچ کا کہنا ہے کہ عید سے قبل 3 فلائٹس کے ذریعے تمام پاکستانی قیدیوں کی وطن واپسی کو یقینی بنایا جائے گا اور تیسری فلائٹ پاکستانیوں کو لیکر پیر کے روز پاکستان پہنچے گی۔