اسلام آباد (سٹاف رپورٹر) کنٹرول لائن کے نکیال سیکٹر میں بھارتی فوج کی شہری آبادی پر فائرنگ سے 3 افراد شدید زخمی ہوگئے۔ پاک فوج کے شعبہ تعلقات عامہ (آئی ایس پی آر) کے مطابق بھارتی فوج نے ایک بار پھر سیز فائر معاہدے کے خلاف ورزی اور ہٹ دھرمی کا مظاہرہ کرنے ہوئے کنٹرول لائن کے نکیال سیکٹر میں شہری آبادی کو جان بوجھ کر نشانہ بنایا۔ آئی ایس پی آر کے مطابق بھارتی فوج نے شہری آباد پر بلا اشتعال فائرنگ کی اور مارٹر گولے برسائے۔ بھارتی فوج کی فائرنگ سے گاؤں خانی اور اولی کے رہائشی3 شہری شدید زخمی ہوگئے، جنہیں محفوظ مقام پر منتقل کر کے طبی امداد فراہم کی جا رہی ہے۔ دوسری جانب دفترخارجہ کی جانب سے بھارت کے سینئر سفارتکار کو دفترخارجہ طلب کر کے پاکستان نے سیز فائر کی خلاف ورزی پر شدید احتجاج ریکارڈ کرایا اور بتایا کہ بھارتی فائرنگ سے نکیال سیکٹرمیں 18سالہ کرم دین ولد اللہ دین، اولی گاؤں کا رہائشی 20 سالہ محمد رضوان ولد محمد تاج اور خانی گاؤں کا رہائشی 30 سالہ حافظ الیاس ولد محمد شریف شدید زخمی ہوئے۔ بھارتی سینئر سفارتکار کو احتجاجی مراسلہ تھما دیا گیا۔ ترجمان نے کہا کہ بھارتی خلاف ورزیاں کنٹرول لائن پر کشیدگی بڑھانے کی کوشش ہیں۔ کشیدگی بڑھا کر بھارت مقبوضہ کشمیر سے دنیا کی توجہ نہیں ہٹا سکتا۔