اسلام آباد (اے پی پی) وفاقی وزیر برائے منصوبہ بندی ، ترقی ، اصلاحات و خصوصی اقدامات اسد عمر نے کہا ہے کہ آ ئندہ مالی سال کے دوران سی پیک سے منسلک32 پراجیکٹس کے لیے 77 ارب مختص کئے گئے ہیں۔ انہوں نے کہا کہ پبلک سیکٹر ڈویلپمنٹ پروگرام (پی ایس ڈی پی) 2020-21ء میں 32 سی پیک پراجیکٹس کا احاطہ کیا گیا ہے جن میں 77ارب روپے مختص کیے جائیں گے۔ ان منصوبوں میں ایم ایل1 ، کراچی سرکلر ریلوے (کے سی آر) ، ژوب۔کچلاک روڈ ، یارِک- ژوب سمیت ژوب بائی پاس ، نوکنڈی-مشخیل اور چترال-بونی-مستوج روڑ کی بہتری اور توسیع جیسے پراجیکٹس شامل ہیں۔ انہوں نے مزید کہا کہ حکومت توانائی کی طلب کو پورا کرنے کے لئے سی پیک میں توانائی کے مزید منصوبوں کو شامل کرنے کے لئے تیار ہے۔