اسلا م آباد (وقائع نگار خصوصی) مسلم لیگ (ق) کے صدر و سابق وزیراعظم چودھری شجاعت حسین نے اللہ تعالیٰ کے حضور دعا کی ہے کہ یا اللہ کریم ہمارے گناہوں کو معاف فرما دے اور ہم پر رحم فرما۔ انہوں نے سورج گرہن کے موقع پر رب العالمین کے حضور گڑگڑاتے ہوئے دعا کی کہ اے زمین و آسمان کے حقیقی مالک اور فرماں روا اس میں کوئی شبہ نہیں کہ کرونا اور دیگر تمام آفات ہمارے گناہوں کی وجہ سے ہیں، اللہ کریم تو قرآن پاک میں بجا ارشاد فرماتا ہے کہ اگر تم میری اطاعت کرو گے تو میں تمہیں کیوں عذاب میں مبتلا کروں گا۔ واقعی ہم تیری اطاعت سے دور ہو گئے ہیں۔ ہم پر اپنا فضل و کرم فرما۔ تیرے رحم کا کوئی کنارہ نہیں۔ ہماری غلطیاں اور گناہ معاف فرما دے اور ہمیں کرونا اور دیگر آفات سے نجات عطا فرما۔