لاہور(نمائندہ سپورٹس +سپورٹس رپورٹر) لاہور قلندرز نے ٹی ٹونٹی چیمپئنز لیگ کی بحالی کی حمایت کرتے ہوئے کہا ہے کہ اس طرح کے ٹورنامنٹس کرکٹ کے فروغ کیلئے کافی اہم ثابت ہو سکتے ہیں۔برطانوی میڈیا کے مطابق ٹی ٹونٹی لیگز کی ٹاپ ٹیموں کے درمیان چیمپئنز لیگ کو ایک بار پھر کرایا جا سکتا ہے۔پی ایس ایل ٹیم لاہور قلندرز کے سی ای او عاطف رانا نے کہا کہ کرکٹ کو اگر فٹبال کی طرح مشہور کھیل بنانا ہے تو فرنچائز کرکٹ کو فروغ دینا ہوگا اور اس ضمن میں چیمپئنز لیگ جیسا ٹورنامنٹ کافی اہم کردار ادا کرے گا۔ چیمپئنز لیگ ٹی ٹونٹی میں آئی پی ایل اور پی ایس ایل کی ٹیموں کا بھی سامنا ہو سکتا ہے جو پاکستان بھارت انٹرنیشنل میچز کی طرح ہی ہائی وولٹیج میچ ہوگا۔ چیمپئنز لیگ ٹاپ ٹورنامنٹ ڈومیسٹک سطح کے پلیئرز کو بھی انٹرنیشنل کرکٹ جیسا ہی ایکسپوژر دے گا جس سے کھلاڑی کی صلاحیتوں میں بھی نکھار آئے گا۔