پشاور/ وانا (نیٹ نیوز+ نوائے وقت رپورٹ) کاؤنٹر ٹیررازم ڈیپارٹمنٹ (سی ٹی ڈی) اور حساس ادارے نے پشاور میں دہشتگردی کا منصوبہ ناکام بنا دیا۔ سکیورٹی ذرائع کے مطابق سی ٹی ڈی اور حساس ادارے نے پشاور کے نواحی علاقے شاہ پور میں مشترکہ آپریشن کرکے دہشتگردی کا منصوبہ ناکام بنایا۔ زیرتعمیر مکان سے 2 خود کش جیکٹس اور بارودی مواد برآمد کر لیا گیا۔ سکیورٹی ذرائع کے مطابق زیر تعمیر مکان سے چار دستی بم، پریما کارڈ اور بال بیئرنگ بھی برآمد کئے گئے جبکہ دہشت گرد فرار ہو گئے۔ ذرائع کے مطابق دہشت گردوں کا سراغ مل گیا ہے اور جلد انہیں گرفتارکر لیا جائیگا۔ ادھر شمالی وزیرستان میں سڑک کنارے نصب بارودی مواد پھٹنے سے دو ایف سی اہلکار زخمی ہو گئے۔ دونوں کو ہسپتال داخل کرا دیا گیا ہے۔