سعودی عرب نے کرونا سے پیدا ہونیوالی صورتحال کے باعث حفاظتی انتظامات اور احتیاطی تدابیر کے پیش نظر حج کے لیے ایس او پیز جاری کر دیئے جس کے تحت خانہ کعبہ یا حجراسود کو چھونے اور چومنے کی اجازت نہیں ہو گی۔ سینیٹائزر کا استعمال اور ماسک لازمی ہو گا، حجاج کرام ایک دوسرے سے ڈیڑھ، ڈیڑھ میٹر کا فاصلہ رکھیں گے۔ کنکریاں بھی مہیا کی جائیں گی، ایک وقت میں 50 حجاج کنکریاں مار سکیں گے۔ اسی طرح 28 ذوالقعدہ سے 12 ذوالجہ تک بغیر اجازت مقامات مقدسہ میں داخلہ ممنوع ہو گا۔ اس بار 30 فیصد سعودی شہری جبکہ 70 فیصد سعودی عرب میںمقیم غیر ملکی حج کی سعادت حاصل کرینگے جس کے لیے رجسٹریشن 6جولائی (سوموار) سے شروع ہو چکی ہے جو 10 جولائی (جمعہ) تک جاری رہے گی۔حجاج کرام تو ہوتے ہی خوش نصیب ہیں لیکن اس سال حج کرنے والے یقیناً ہمیشہ اپنی قسمت پر نازاں رہیں گے اس لیے وہ بھی رب کے حضور گڑ گرائیں اور کرونا جیسی وباؤں سے دنیا کی حفاظت کے لیے دعائیں مانگیں۔ تاہم حج انتظامات پر امت مسلمہ بھی سعودی حکومت کو دادو تحسین پیش کرتی ہے۔