سرگودھا (نامہ نگار) سرگودھا میں پولیس مقابلہ دو ڈاکو ہلاک جبکہ ایک فرار ہو گیا۔ گزشتہ رات کوٹ مومن پرانا بھلوال کے قریب سرفراز گوندل نامی شخص سے تین ڈاکو موٹر سائیکل اور راہگیروں سے نقدی چھین کر فرار ہو گئے۔ پولیس ذرائع کے مطابق تعاقب کرنے پر ڈاکوئوں نے فائرنگ شروع کر دی جس کے نتیجہ میں ایک ڈاکو عامر شہزاد اپنے ہی ساتھی کی فائرنگ سے ہلاک ہو گیا اور باقی دو ڈاکو فرار ہو گئے۔ ایس ڈی او کوٹ مومن کی سر براہی میں پولیس کی بھاری نفری نے فرار ڈاکوں کی تلاش کے لیے ناکہ بندی کر دی۔ چک 9ڈبانوالا میں پولیس مقابلہ ہوا جس میں دوسرا ڈاکو وقاص علی بھی ہلاک ہو گیا۔ پولیس نے موٹر سائیکل اور اسلحہ برآمد کر لیا۔ پولیس ذرائع کے مطابق ہلاک ہونے والے ڈاکو تین روز پہلے علاقہ کوٹ مون میں شہید ہونے والے پولیس اہلکار حسین تلہ کے قتل میں ملوث تھے۔ ہلاک ہونے والے ڈاکو پنڈی راواں کے رہائشی بتائے گئے ہیں۔ پولیس نے ڈاکوں کی نعشیں قبضہ میں لے کر کارروائی شروع کر دی ہے۔